Treće mjesto za Anju Miljanić

na literarnom konkursu „Šuma je moja adresa“

„U šumi se kriju sve tajne krivudavih i nestvarnih puteva, čudnovatih vrsta biljaka kao i staništa brojnih životinja. Kad bih stvarala svoju bajku, ona bi počinjala, a i završavala se baš tamo, u šumi. Tamo gdje rijeka čuje more, tamo gdje kapljice kiše klize po stablu, gdje jutarnja rosa kvasi zelenu travu, tamo gdje šumski vjetar zaviori opalo lišće. A kada bismo pogledali malo više, glava bi nam već bila u oblacima, oko nas pružao bi se širok spektar nijansi plave boje i ogromno prostranstvo na kom se igraju sunce i mjesec.”

Na literarnom konkursu pod sloganom  „Šuma je moja adresa“, u organizaciji Dječijeg saveza i sekretarijata za uređenje prostora i zaštitu životne sredine, učenica naše škole, Anja Miljanic (IX-1) je osvojila treċe mjesto, pod mentorstvom predmetne nastavnice Vanje Pićurić. Dana 4.4.2025. godine u Gradskoj kući, upriličena je i dodjela nagrada.

Još od šestog razreda Anja pohađa literarnu sekciju, pa je intenzivan rad sada i krunisan ovom nagradom. Posebno je zadovoljstvo to što je broj prijavljenih kandidata bio veliki, ali su se riječi naše Anje uspjele izdvojiti i doprijeti do višečlanog, stručnog žirija. Naša učenica je posebno zahvalna svojoj nastavnici i kaže da je prof. Pićurić neko ko je u njoj probudio interesovanje i želju za pisanjem. Daljim njegovanjem, podrškom, ohrabrivanjem i uputstvima uspjela je Anju navesti da pravim putem prodre kroz šume realnosti i mašte i napiše divan tekst.

Autor teksta: Suzana Stanišić Bijelović